நம்பிக்கை

நவம்பர் 4, 2009

பூமி சுற்றினால் இரவும் பகலாகும்
கண்கள் மூடினால் அதுவும் இரவாகும்
இரவை நிலவு வெறுப்பதும் இல்லை
இரவின்றி நிலவும் வருவதுமில்லை
இரவும் நிலவும் இயற்கையின் இணைப்பாகும்
அதை மாற்ற நினைப்பது நகையாகும்
கண்கள் சிந்தும் கண்ணீருக்கு
காரணங்கள் இருந்தாலும்
காலம் செய்த காயங்களுக்கு
காலமே மருந்தாகும்
கண்கள் மூடிய பூனையின்
கற்பனைகள் யாவும் கானல் நீராகும்
செய்த செயல்கள் நல் உரமாகும் எண்ணத்தில்
சரித்திரம் படைக்கும் திட்டங்கள் பல உருவாகும்
நல் துணிவு கொண்ட நெஞ்சினால் வரலாறு உருவாகும்
அது எல்லோர்க்கும் வரமாகும்


காதலின் நினைவுகள்

செப்ரெம்பர் 4, 2009

நிலவை சுற்றும் மேகங்களாய்
உன்னை சுற்றித் திரிந்த அவன் நினைவுகள்
எத்தனை கரு மேகங்கள் சூழ்ந்தாலும்
நிறம் மாறாத நிலவைப் போன்று
அவன் நினைவகற்றா உன் நினைவுகள்
என்று பதியம் போட்ட பட்டு
ரோஜாச் செடியானது இந்தக் காதல்

உன்னிடம் கண்ட அவன் வாசமும்
அவனிடம் கண்ட உன் வாசமும் தான்
இந்த காதலின் சுவாசமானது

அவன் பார்வைத் தீண்டலின் போதெல்லாம்
உன் வெட்கம் இந்தக் காதலின் ஆடையானது

நீ கொடுத்த பொருளை அவனும்
அவன் கொடுத்த பொருளை நீயும்
வீட்டில் எங்கெங்கோ வைத்தாலும் இந்தக்
காதலை மட்டும் உங்கள் நெஞ்சத்தில் வைத்தீர்களே

காற்று கூட புகமுடியா இடத்திலும் இந்தக்
காதல் புகும் என்று உங்கள் நெருக்கத்தில் உணர்த்தினீர்களே

உன் நெற்றியை ஒற்றியே அவன்
பொட்டிட்டுக் கொள்ளும் போதெல்லாம்
உன் புன்னகையில் பூத்துக் குலுங்கிய  இந்தக் காதல்

இன்று ,

உடைந்த வளையல்களையும், கிழிந்த புடவைகளையும்,
பொட்டிழந்த உன் நெற்றியையும் பார்க்கும் போது
உன் கண்களின் நீரில் மௌனமாகி உனக்குள் சிறைபட்டுவிட்டது.
உன் நெற்றியில் பொட்டில்லாத காரணத்தால் தான்
அவன் புகைப்பட நெற்றியும் கூட பொட்டிட்டுக் கொள்ள மறுக்கிறது.

அவன் மறைந்தாலும் உங்கள் காதல்
உனக்குள் வாழ்ந்து கொண்டிருக்கிறது

நீங்கள் உன்னதமானவர்கள்
நீ மறைந்தாலும் இந்தக் காதல்
உங்கள் கல்லறையைச் சுற்றி வாழ்ந்து கொண்டிருக்கும்.


காதலில் கொடுமை பிரிவு

ஜூலை 17, 2009

காதலில் கொடுமை பிரிவு என்றாய்
பிரிவில் இனிமை நினைவுகள் என்றாய்
நினைவில் கொடுமை வெறுமை என்றாய்
வெறுமையில் இனிமை அமைதி என்றாய்
அமைதியின் உருவம் என் கண்கள் என்றாய்
கண்கள் நிறைய காதல் தந்தாய்
கண் மூடியும் கனவாய் நின்றாய்
காயங்களோடா பிரிந்து சென்றாய்

காதலில் கொடுமை பிரிவு என்பேன்………


ரகசியக் காதல்

ஜூலை 17, 2009

காற்றில் அலைபாயும் உன்
கூந்தலுக்குத் தெரியும் என் மனதின் ஏக்கம்
உன் இடையில் தவழும்
தாவணிக்குத் தெரியும் என் கைகளின் குறும்பு
உன் காலில் சுதி சேரும்
கொலுசுக்குத் தெரியும் என் காதுகளின் ரசனை
நீ கொஞ்சி விளையாடும்
குழந்தைக்குத் தெரியும் என் அன்பு
நீ முனுமுனுக்கும்
பாடலுக்குப்  புரியும் என் கவிதை
உன்னை கவிதையாக்கும் உன்
வெட்கத்திற்குத் தெரியும் என் உரிமை
என்னை குழந்தையாக்கும் உன்
கண்களுக்குத் தெரியும் என் காதல்
உன் அசைவில் ஆடும் என்
மனதிற்கும் தெரியும் உன் ரகசியக் காதல்.


கூண்டுக் கிளி

ஜூலை 9, 2009

காலை எழுந்தவுடன் கடுகடுப்பாய் இருக்கிறாய்
நான் குடிக்கும் தேநீரை விட
உன் சொற்கள் சூடாக இருக்கிறது
உன் வார்த்தைச் சூட்டில் நான்
இட்லி அவிக்கும் போது என் மனமும் வேகுகிறது

நீ பரபரப்பாய் அலுவலகம் செல்லும் போது
நான் மிரண்டு போய் பார்த்துக் கொண்டிருக்கிறேன்
யாரும் இல்லா தனிமையில் என்
மனதோடு மட்டுமே பேசிக் கொண்டிருக்கிறேன்

நீ தொலைபேசியில் என்னை
அழைத்து பேசுவாய் என்ற ஏக்கத்தில்
தொலைபேசியை தலையணையாக்கிக் கொண்டேன்
நீ அணிந்த ஆடைகளை அழுத்திக் கூட துவைக்க முடியவில்லை
எனது தனிமையைக் கூட உன்
நினைவுகளுக்காக விட்டுக்கொடுத்து விட்டேன்

என்னை திட்டிய நாவானாலும்
உன் நாவானதாலே அத்தனை
சுவையும் கொடுக்க வேண்டுமென
நான் அறிந்திராத சமையலையும்
அற்புதமாக சமைக்க கற்றுக் கொண்டுவிட்டேன்
அத்தனைக்கும் வெட்டுக் காயங்களும்
தீ புண்களுமே பரிசாக கிடைத்துள்ளது

மாலை நேரத்து மல்லிகையில் மனம் ஒன்றாமல்
உன் வரவுக்காகவே நீ அழுத்தும்
அழைப்பு மணியோசைக்காக காத்துக் கொண்டிருக்கிறேன்
என் கண்கள் கலங்கினாலும், உள்ளம் வெதும்பினாலும்
அந்த நாள் முடிவில்  என் மடி மீது தலை வைத்து உறங்கும்
உன் முகம் பார்த்து அத்தனையும் மறந்து போகிறேன்

————————————————————————

இவள் யாரென்று எண்ணிப் பார்த்து
தாயா இல்லை தாரமா என்று குழப்பம் அடைவோரே
குழப்பம் வேண்டாம் இவள் பெண் தான்.


நம் வீட்டுக் கடவுள்

மே 11, 2009

ஈருயிர் ஒருயிராய் கலந்து பின்
அவ்வோருயிர் ஈருயிராய்ப் பிறந்து
தன்னுயிர் மறந்து தான் பெற்ற உயிரை
ஆருயிராய் நினைந்து அம்முகம்
கண்டபோதெல்லாம் உலகம் மறந்து
உள்ளம் மகிழ்ந்து ஒவ்வோர் நொடியும்
உன் பிள்ளைக்காகவே வாழும் என் அன்னையே
நின்னைப் போற்ற நாட்காட்டியில்
ஓர் நாளைக் காட்டினால் அது முறையோ
வருடத்தில் ஓர் நாளல்ல என்
வாழ்நாள் முழுவதும் உனைப் போற்றி
வாழ்வாபிஷேகம் செய்வேன் நான் உன் சேய்யல்லவா
எத்தனை கடவுள்கள் உலகத்திலே
அத்தனை கடவுள்களுக்கும் ஓர் உருவம் நீ
படைத்து காத்து அழிப்பவன் கடவுளென்றால்
படைத்து காத்து வாழவைக்கும் நீ
கடவுளுக்கெல்லாம் கடவுளல்லவா
நீ தந்த வரம் அம்மா நான்,
தவமின்றி நான் பெற்ற வரம் அம்மா நீ
உருவமாய் இல்லாவிட்டாலும் என்றும்
என் உயிராய் வாழ்பவளே
என்றும் எனைக் காக்க நீ உண்டு
நாம் வாழும் அனைத்துப் பிறவிக்கும் நம் அன்புண்டு.


வாழ்வு எங்கே

ஜனவரி 30, 2009

ஈரம் இல்லையே ஈரம் இல்லையே

இவர் கண்ணில் மட்டுமில்லை

நெஞ்சிலும் ஈரம் இல்லையே

சக மனிதன் சாகும் போது தன் சாம்ராஜ்யம்

காப்பவனா அரசன் தான்  அழிந்தாலும்

தன் இனம் காக்கத் துடிப்பவனே மனிதன்

தான் ஆடாவிட்டாலும் தன் சதை ஆடும் என்றானே

இங்கே இருப்பவர்கள் இதயமாவது துடிக்கிறதா

ங்கள் நெஞ்சம் பதைக்கவில்லை

அங்கே நிம்மதி நிலைக்கவில்லை

வஞ்சம் தீர்க்கிறார்கள் அவர்கள் வாழ்வை அழிக்கிறார்கள்  

நீ இனம் காக்கவில்லை உன் குணம் காட்டவேண்டாம்

மனம் ஒன்று இருந்தால் மனிதன் என்று நினைத்தால்

மனிதம் காக்க வேண்டாமா

உயிர்களைக் கொன்று அதை வைத்தா உங்கள் கஜானாவை நிரப்புகிறீர்கள்

எங்களுக்கு இலவசம் இனி வேண்டாம்

ங்கள் வாக்குகளை வைத்துள்ளீர்கள் 

எங்கள் இனத்தாரை வாழ விடுங்கள்

ஊண் அழிக்கும் நோய் இல்லை

உயிர் அறுக்கும் வலி உண்டு

இரவேது பகலேது இருப்பதற்கே இடமில்லை

உறவேது பிரிவேது வாழ்வதற்கே உரிமையில்லை என்று

வாடும் மைந்தர்களின் இரைப்பையை நிறைக்க வேண்டாம்

வாரி எடுத்து அணைக்க வேண்டாம்

தோள் கொடுத்து தூக்க வேண்டாம்

அவர் செந்நீரை நிறுத்தி கண்ணீரை துடைக்க

ஒரு விரலேனும் தாருங்கள்