சர்வதேச கிரிக்கெட் நிலவரம்

செப்ரெம்பர் 22, 2009

[clearspring_widget title=”Cricinfo International Scores” wid=”482c264908cd8b29″ pid=”4ab8ad2662fa008b” width=”300″ height=”250″ domain=”www.widgets.cricinfo.com”]


காதலின் நினைவுகள்

செப்ரெம்பர் 4, 2009

நிலவை சுற்றும் மேகங்களாய்
உன்னை சுற்றித் திரிந்த அவன் நினைவுகள்
எத்தனை கரு மேகங்கள் சூழ்ந்தாலும்
நிறம் மாறாத நிலவைப் போன்று
அவன் நினைவகற்றா உன் நினைவுகள்
என்று பதியம் போட்ட பட்டு
ரோஜாச் செடியானது இந்தக் காதல்

உன்னிடம் கண்ட அவன் வாசமும்
அவனிடம் கண்ட உன் வாசமும் தான்
இந்த காதலின் சுவாசமானது

அவன் பார்வைத் தீண்டலின் போதெல்லாம்
உன் வெட்கம் இந்தக் காதலின் ஆடையானது

நீ கொடுத்த பொருளை அவனும்
அவன் கொடுத்த பொருளை நீயும்
வீட்டில் எங்கெங்கோ வைத்தாலும் இந்தக்
காதலை மட்டும் உங்கள் நெஞ்சத்தில் வைத்தீர்களே

காற்று கூட புகமுடியா இடத்திலும் இந்தக்
காதல் புகும் என்று உங்கள் நெருக்கத்தில் உணர்த்தினீர்களே

உன் நெற்றியை ஒற்றியே அவன்
பொட்டிட்டுக் கொள்ளும் போதெல்லாம்
உன் புன்னகையில் பூத்துக் குலுங்கிய  இந்தக் காதல்

இன்று ,

உடைந்த வளையல்களையும், கிழிந்த புடவைகளையும்,
பொட்டிழந்த உன் நெற்றியையும் பார்க்கும் போது
உன் கண்களின் நீரில் மௌனமாகி உனக்குள் சிறைபட்டுவிட்டது.
உன் நெற்றியில் பொட்டில்லாத காரணத்தால் தான்
அவன் புகைப்பட நெற்றியும் கூட பொட்டிட்டுக் கொள்ள மறுக்கிறது.

அவன் மறைந்தாலும் உங்கள் காதல்
உனக்குள் வாழ்ந்து கொண்டிருக்கிறது

நீங்கள் உன்னதமானவர்கள்
நீ மறைந்தாலும் இந்தக் காதல்
உங்கள் கல்லறையைச் சுற்றி வாழ்ந்து கொண்டிருக்கும்.


காதலில் கொடுமை பிரிவு

ஜூலை 17, 2009

காதலில் கொடுமை பிரிவு என்றாய்
பிரிவில் இனிமை நினைவுகள் என்றாய்
நினைவில் கொடுமை வெறுமை என்றாய்
வெறுமையில் இனிமை அமைதி என்றாய்
அமைதியின் உருவம் என் கண்கள் என்றாய்
கண்கள் நிறைய காதல் தந்தாய்
கண் மூடியும் கனவாய் நின்றாய்
காயங்களோடா பிரிந்து சென்றாய்

காதலில் கொடுமை பிரிவு என்பேன்………


ரகசியக் காதல்

ஜூலை 17, 2009

காற்றில் அலைபாயும் உன்
கூந்தலுக்குத் தெரியும் என் மனதின் ஏக்கம்
உன் இடையில் தவழும்
தாவணிக்குத் தெரியும் என் கைகளின் குறும்பு
உன் காலில் சுதி சேரும்
கொலுசுக்குத் தெரியும் என் காதுகளின் ரசனை
நீ கொஞ்சி விளையாடும்
குழந்தைக்குத் தெரியும் என் அன்பு
நீ முனுமுனுக்கும்
பாடலுக்குப்  புரியும் என் கவிதை
உன்னை கவிதையாக்கும் உன்
வெட்கத்திற்குத் தெரியும் என் உரிமை
என்னை குழந்தையாக்கும் உன்
கண்களுக்குத் தெரியும் என் காதல்
உன் அசைவில் ஆடும் என்
மனதிற்கும் தெரியும் உன் ரகசியக் காதல்.


கூண்டுக் கிளி

ஜூலை 9, 2009

காலை எழுந்தவுடன் கடுகடுப்பாய் இருக்கிறாய்
நான் குடிக்கும் தேநீரை விட
உன் சொற்கள் சூடாக இருக்கிறது
உன் வார்த்தைச் சூட்டில் நான்
இட்லி அவிக்கும் போது என் மனமும் வேகுகிறது

நீ பரபரப்பாய் அலுவலகம் செல்லும் போது
நான் மிரண்டு போய் பார்த்துக் கொண்டிருக்கிறேன்
யாரும் இல்லா தனிமையில் என்
மனதோடு மட்டுமே பேசிக் கொண்டிருக்கிறேன்

நீ தொலைபேசியில் என்னை
அழைத்து பேசுவாய் என்ற ஏக்கத்தில்
தொலைபேசியை தலையணையாக்கிக் கொண்டேன்
நீ அணிந்த ஆடைகளை அழுத்திக் கூட துவைக்க முடியவில்லை
எனது தனிமையைக் கூட உன்
நினைவுகளுக்காக விட்டுக்கொடுத்து விட்டேன்

என்னை திட்டிய நாவானாலும்
உன் நாவானதாலே அத்தனை
சுவையும் கொடுக்க வேண்டுமென
நான் அறிந்திராத சமையலையும்
அற்புதமாக சமைக்க கற்றுக் கொண்டுவிட்டேன்
அத்தனைக்கும் வெட்டுக் காயங்களும்
தீ புண்களுமே பரிசாக கிடைத்துள்ளது

மாலை நேரத்து மல்லிகையில் மனம் ஒன்றாமல்
உன் வரவுக்காகவே நீ அழுத்தும்
அழைப்பு மணியோசைக்காக காத்துக் கொண்டிருக்கிறேன்
என் கண்கள் கலங்கினாலும், உள்ளம் வெதும்பினாலும்
அந்த நாள் முடிவில்  என் மடி மீது தலை வைத்து உறங்கும்
உன் முகம் பார்த்து அத்தனையும் மறந்து போகிறேன்

————————————————————————

இவள் யாரென்று எண்ணிப் பார்த்து
தாயா இல்லை தாரமா என்று குழப்பம் அடைவோரே
குழப்பம் வேண்டாம் இவள் பெண் தான்.


புலம்பல்

ஜூன் 23, 2009

மேகங்களைக் கரைத்து, நீரோடையின் சப்தத்தை முத்தமிட்டு, குளிர் போர்வை போர்த்திக்கொண்டு, பாதம் தொட்டு உச்சி குளிரச் செய்து வீசும் தென்றல், அந்தக் காற்றில் நடுங்கும் வேப்பமரத்து இலைகள், எதிர் வீட்டுக் குழந்தைகள் மணல் குவித்து விளையாடும் அழகு, இதை உள்வாங்கிக் கொண்டிருக்கும் தனிமை சுகமா அல்லது சுமையா என்று எண்ணிக்கொண்டிருக்கும் போது, நினைவுகளின் அழுத்தத்தினால் மனதில் ஏற்படும் வலி வாழ்க்கையை தின்று கொண்டிருக்கிறதே. ஏன் யாரும் என்னை புரிந்து கொள்ள மறுக்கிறார்கள்? ஏன் யாராலும் என் உணர்வுகளைப் புரிந்து கொள்ள முடியவில்லை? பேச மறுக்கும் தந்தையும், உதாசீனப் படுத்தும் தம்பியும், உதவ மறுக்கும் அண்ணனும், கேலி பேசும் தங்கையும் நினைவில் மாறி மாறி வந்து போகிறார்கள்.எது நடந்தாலும் எப்போதும் மாறாத அன்னையின் பாசத்தாலே அவர்கள், நினைவில் தொடர்ந்து நிற்பதில்லை. இதே மன நிலை உலகில் பலருக்கு இருப்பினும் என்னை மட்டும் ஏன் மன நோயாளி என்கிறார்கள்? மனதில் நினைக்கும் இவற்றையெல்லாம் சொல்லத் தெரியாததாலா? அல்லது வீட்டின் சுண்ணாம்புச் சுவரையே வெறித்துப் பார்த்துக் கொண்டிருப்பதாலா? யாருக்குத் தெரியும் அத்தனைக்கும் விடை, விளக்கைத் தேடும் விட்டில் பூச்சியிலும், அதனைக் கவ்வும் பல்லியிலும் உள்ளதென. இந்த உலகமும் அவ்வாறு தானே உள்ளது. என்ன செய்ய நான் மனநோயாளி எனப் பட்டாலும், என் மனம் பேசுவது எனக்கு கேட்கிறது. உங்கள் மனம் பேசுவதை நீங்கள் கேட்கிறீர்களா?


நம் வீட்டுக் கடவுள்

மே 11, 2009

ஈருயிர் ஒருயிராய் கலந்து பின்
அவ்வோருயிர் ஈருயிராய்ப் பிறந்து
தன்னுயிர் மறந்து தான் பெற்ற உயிரை
ஆருயிராய் நினைந்து அம்முகம்
கண்டபோதெல்லாம் உலகம் மறந்து
உள்ளம் மகிழ்ந்து ஒவ்வோர் நொடியும்
உன் பிள்ளைக்காகவே வாழும் என் அன்னையே
நின்னைப் போற்ற நாட்காட்டியில்
ஓர் நாளைக் காட்டினால் அது முறையோ
வருடத்தில் ஓர் நாளல்ல என்
வாழ்நாள் முழுவதும் உனைப் போற்றி
வாழ்வாபிஷேகம் செய்வேன் நான் உன் சேய்யல்லவா
எத்தனை கடவுள்கள் உலகத்திலே
அத்தனை கடவுள்களுக்கும் ஓர் உருவம் நீ
படைத்து காத்து அழிப்பவன் கடவுளென்றால்
படைத்து காத்து வாழவைக்கும் நீ
கடவுளுக்கெல்லாம் கடவுளல்லவா
நீ தந்த வரம் அம்மா நான்,
தவமின்றி நான் பெற்ற வரம் அம்மா நீ
உருவமாய் இல்லாவிட்டாலும் என்றும்
என் உயிராய் வாழ்பவளே
என்றும் எனைக் காக்க நீ உண்டு
நாம் வாழும் அனைத்துப் பிறவிக்கும் நம் அன்புண்டு.